هزيمة الأهلي أمام بيراميدز ليست صدمة.. لكن سيحاسب على كارثة ريبيرو؟!

علق الإعلامي محمد شبانة على خسارة الأهلي أمام بيراميدز، مؤكدًا أن الهزيمة لم تكن مفاجئة للجماهير، ومشدّدًا على أن أزمة اختيار المدرب الإسباني خوسيه ريبيرو ومسألة المسؤولية داخل النادي تحتاج إلى وقفة جادة ومحاسبة عاجلة.

وقال الإعلامي محمد شبانةعبر راديو “شعبي إف إم”: “هل الهزيمة صدمة لجمهور الأهلي؟ لا مش صدمة ولا حاجه، الإحساس بالهزيمة صعب عشان كده الجمهور متضايق وهايج وزعلان وغضبان يعني كل حاجة يعني.. إنما، كلمة صدمة دي يعني غير متوقعة.. فهل هزيمة الأهلي من بيراميدز امبارح غير متوقعة؟ لأ أبداً، متوقعة ونص كمان”.

وتابع: “ده عزاء الأهلاوية امبارح إنه بيراميدز سيء وانطلاقته برضه سيئة، فعزاء الوحيد للأهلي كده، فده كان مدي أمل إن الأهلي يكسب المباراة ويفوق بقى.. إنما لو كان بيراميدز في مستواه العادي كان الجمهور داخل ومقتنع إنه خسران، عشان كده الخسارة مش مفاجأة ولا صدمة”.

وأردف: “قولنا قبل كده هذا الريبيرو، نبوس إيديكم هاتوا غيره… الجمهور بيقول كده يعني وصلت لبوس الإيدين خلاص بقى.. ومن بدري بقول لكم إن الراجل ده مش قد الأهلي، فالنهارده في قاعدة اجتماع عشان يتقرر فيها إقالة الراجل ده وتوجيه الشكر ليه”.

وشدد: “السؤال مين هيتحاسب على اختيار المدرب ده؟ سيبك من فلوس الشرط الجزائي حتى لو مفيش ومش هتدفع.. بس أنت اخترت مدرب غلط في أهم توقيت في تاريخ الأهلي قبل كأس العالم للأندية اللي كان ممكن الأهلي يخش يجلجل ويشتغل ويجي يحقق نتائج”.

وأردف: “وبعدين داخل موسم بقى عايز تسترد أفريقيا اللي خطفها منك بيراميدز، عايز تأكد فوزك بالدرع اللي بيشكك فيه بيراميدز واللي بينافس في الدرع دلوقتي الزمالك اللي عايز يرجع بقوة”.

واختتم: “فاللي جاب الراجل ده بقى مين هيحاسبه؟ هو ده السؤال، مين هيحاسبه على الملايين اللي ادفعت في زيزو وتريزيجيه وبن شرقي ورمضان وكل الناس دي والأهلي مستفدش منها لغاية دلوقتي بحاجة”.