كهربا عالية في أوضة اللبس بعد تعادلات الأهلي.. وبيبو يرد

تحدث الإعلامي مهيب عبدالهادي، خلال برنامجه اللعيب المذاع عبر قناة MBC مصر، عن الأجواء داخل النادي الأهلي بعد التعادلات الأخيرة في الدوري الممتاز. وقال:
“كابتن خالد بيبو، أنت راجل في المطبخ، وكنت مدير كرة، عارف يعني إيه الأهلي لما يتعادل، أوضة اللبس بتبقى عاملة إزاي، والأجواء بتبقى مكهربة والكهربا عالية جدًا.. فمن ثلاث مباريات في الدوري الأهلي يتعادل في مباراتين بهذا السكواد وهذه التدعيمات؟”

من جانبه، رد خالد بيبو مؤكدًا أن النتائج الأخيرة لا تعكس بالضرورة مستوى الفريق أو إمكانياته الحقيقية، مشددًا على أن كرة القدم لا تسير دائمًا كما يتوقع الجمهور. وقال:
“لازم نعترف إن مش هو ده الأهلي اللي كنا متوقعينه، والناس كانت مستنية نتائج أكبر.. لكن حتى الفرق الكبرى زي باريس سان جيرمان لما كان معاه ميسي ونيمار، مكنش بيكسب 4 و5 في كل مباراة. كرة القدم فيها تفاصيل وأحداث كتيرة بتغير النتائج.”

وأضاف: “إحنا لازم منبقاش بنحكم بشكل مطلق مع أول نتيجة مش على المزاج، ونقول إن اللاعيبة وحشة، والصفقات فاشلة، والمدرب مش مناسب، ومجلس الإدارة غلط.. لازم يبقى في واقعية.”

وأشار بيبو إلى أن الفريق مطالب بتقديم أداء أفضل في الفترة المقبلة، لكنه أكد أن الضغط على اللاعبين والجهاز الفني أمر طبيعي:
“اللاعيبة هتتحط تحت ضغط أكتر، والمدير الفني كذلك، لأن البداية مكانتش زي ما الجمهور عايز.. لكن ده طبيعي في كرة القدم، مفيش ضمانات 100%.”

واختتم حديثه بالتأكيد على أن الأهلي يمتلك المقومات لتصحيح المسار، لكن الأهم هو دعم اللاعبين والجهاز الفني من أجل استعادة الثقة وتحقيق الانتصارات.