“في نجوم بعد الاعتزال بيبحثوا عن التريند”!!

علق أيمن يونس، نجم الزمالك السابق، على تصريحات محمود عبد الرازق شيكابالا نجم وأسطورة القلعة البيضاء المعتزل، بشأن كشفه عن بعض كواليس “أوضة لبس” الفريق قبل نهائي دوري أبطال إفريقيا 2016، والتي أكد أنه كانت هناك بعض التجاوزات من لاعبين في الفريق أدت إلى خسارة اللقب في النهاية.

وقال أيمن يونس في تصريحات إذاعية اليوم الأحد: “في لاعيبة بتطلع تتكلم كتير، اللي بتعتزل بالذات .. وإحنا شفنا أمثلة كتيرة اللاعيبة بتطلع تتكلم على الشاشات واللي عايزين يخطفوا تريند واللي عايزين يعملوا لنفسهم شكل مختلف واللي عايزين يعملوا لنفسهم حاجة مختلفة، وده حقكم كل واحد يتكلم ويبين اللي عنده واللي خباه واللي أسرار أوضة اللبس وأسرار ناديه، وكل واحد يتكلم بالطريقة اللي هو عايزها”.

وشدد: “لكن في أسرار تتقال وفي أسرار متتقالش، لإن أنت مينفعش تقلل من قيمة ناديك في أي حال من الأحوال، أنا راجل عندي أسرار في نادي الزمالك واللاعيبة كتير، أنا كأيمن يونس عندي أسرار في اتحاد الكورة، 2005 و2006 لحد 2011 موجود في اتحاد، عندي أسرار وكتيرة، لكن دي حرمة المكان اللي أنت فيه، احترامك للمكان اللي أنت فيه، أسراره بالذات لو سلبية أو فيها أخطاء مش من حقك تتكلم فيها”.

وتابع: “ومش من حقك إن أنت تعلنها بالشكل ده وتقلل من قيمة المكان أو تقلل من قيمة التاريخ اللي أنت منه أو من قيمة اسم ناديك، حاجات مهمة قوي، مهمة قوي لكل نجومنا اللي اعتزلوا وبيطلعوا على الشاشات، خلوا بالكم، خلوا بالكم على تاريخ ناديكم وخلوا بالكم على اسم زمايلكم، ده جزء من احترامكم”.

واختتم: “لو في أخطاء خلاص مبتتكلمش فيها، مبقولش تخبيها، لكن ما تزيدش بيها، متكسبش بيها منظرة، متتمنظرش على التاريخ بتاع ناديك أو على زمايلك أو على أي حد، حاجات مهمة قوي لازم نجومنا المعتزلين بجد يخلوا بالهم منها”.