أحمد شوبير يثور على الهواء عبر قناة الأهلي بسبب الهجوم على نجله مصطفى

انتقد الإعلامي أحمد شوبير الجدل الكبير المثار مؤخرًا حول مركز حراسة المرمى في الأهلي ومن يجب أن يحرس عرين الفريق، مؤكدًا أن الأمر تحول إلى ما يشبه “المسلسل الطويل” رغم أن القرار النهائي يخص الجهاز الفني فقط.

وقال شوبير عبر قناة الأهلي:”موضوع حراس الأهلي عامل صداع لبرامج وقنوات واستوديوهات تحليلية.. مين يلعب ومين ما يلعبش! يا جماعة في مدرب هو صاحب القرار، وفي مدرب حراس كمان، مش عارف إيه القصة دي.”

وأضاف:”حتى زملائنا اللي كانوا حراس مرمى بيتكلموا وكأنهم ما غلطوش قبل كده، هو في حارس ما بيغلطش؟! كل الحراس بيغلطوا، وأنا نفسي غلطت، والمهم في النهاية إن الحارس يقاتل عشان يحافظ على مكانه، لكن القرار في الملعب للجهاز الفني.”

وتابع شوبير:”للأسف الأخطاء لما بتحصل من الأهلي بتقف في زور الناس، مع إن الأخطاء موجودة في كل الأندية. لو بتتكلم عن الأهلي، اتكلم عن الزمالك كمان بنفس الشكل، هو ليه الكيل بمكيالين؟”

وعن المنافسة بين الشناوي ومصطفى شوبير، قال: “مفيش أي مشكلة، الشناوي حارس مصر الأول وده أمر مفروغ منه، وفي نفس الوقت شوبير حارس كويس ولما بيلعب بيكون هايل، حتى لو ما كانش موفق في مباراة واحدة. المهم إن عندنا حراس مميزين والمستقبل قدامهم.”

واختتم حديثه قائلاً:”القصة مش محتاجة ضجة، دي بقت عاملة زي مسلسل من 100 حلقة! في النهاية القرار قرار المدرب مش قرار البرامج أو الاستوديوهات.”