“جايين تراقبوا ولا تعملوا علاقات.. لازم تتحاسبوا”!

وجَّه الإعلامي خالد الغندور، عبر إذاعة “أون سبورت إف إم”، انتقادات حادة إلى بعض مراقبي المباريات في الدوري المصري، متسائلًا عن دورهم الحقيقي داخل الملاعب، وما إذا كانوا يؤدون مهامهم وفقًا للوائح أم يتم اختيارهم بالمجاملة.

وقال خالد الغندور عبر راديو “أون سبورت إف إم”: “أنا عندي مشكلة كبيرة جدًا مع المراقبين، واحد بيتعين عشان يراقب مباراة، فالمراقب ده متعين ليه؟ متعين عشان يروح يتفرج على الماتش ولا يعمل علاقات مع المدربين واللاعيبة؟ متعين عشان يتفرج جوه الملعب على الماتش؟ ولا متعين لأنه متجامل من مسؤول رياضي حاطه في المكان ده؟ ولا متعين عشان يقبض كل ماتش على حسب المراقبة بتاعته؟”.

وتابع: “المراقب حضرتك جاي يراقب وجاي يدون كل حاجة بتحصل في الملعب.. فحضرتك لما تيجي تقول مثلاً حصل سباب جماعي من الزمالك أو حصل سباب جماعي من الأهلي… تمام، طيب هنا السؤال: لو حصل سباب جماعي من الزمالك أو من الأهلي، المراقب ميسمعهمش ازاي؟”.

وأضاف: “ممكن يكون في سباب جماعي ألفاظه جامدة جدًا وفي ألفاظ متوسطة، هل ده يمنع إن المراقب يكتب الألفاظ الجامدة والمتوسطة ويترك قرار العقوبة للجنة المسابقات أو رابطة الأندية؟ لكن لو المراقب مكتبش حاجة خالص، يبقى حاططني في موقف إن المراقب ده مشجع، أو المراقب ده متعمد، أو المراقب ده اتقاله متكتبش، أو المراقب ده كتب ولجنة المسابقات طنشت”.

وشدد: “مفيش حل، لأن الناس اللي قاعدة في التلفزيون سامعة وفي الملعب سامعين، والمراقب هو اللي مش سامع، فدي كارثة في حد ذاتها، لازم نحط قاعدة: مفيش حاجة اسمها واحد منتمي للأهلي أو الزمالك، وإنك تسمع الكلام على حسب انتمائك، لا، انت تسمع الكلام على حسب الصح اللي يتعمل:.

وأردف: “لو المراقب مكتبش، مينفعش تيجي تقول النادي ده مطلعش عليه قرار لأنه المراقب مكتبش .. حضرتك لو المراقب مكتبش، يقعد في بيته ما تحطوش في الماتش اللي بعد كده وتكافئه، لا، انت تعاقبه لأنه مشافش شغله، لأنه راح الملعب ومعملش اللي عليه”.

واختتم: “المراقب عامل زي القاضي زي الحكم… هل ممكن تشوف حكم على صفحته لابس فانلة نادي أو بيتريق على نادي؟ نفس القصة بالنسبة للمراقبين، تخش على صفحاتهم تلاقي اللي بيشجع فرقة، واللي بيتريق على فرقة تانية، إيه ده؟ هو ده شغل صح؟ هم دول فعلاً اللي بيراقبوا على ماتشات الدوري ويدوا كل واحد حقه؟ مش طبيعي”.