احمد حسن: حاجة واحدة بس تجعل حسام حسن مستمرًا في تدريب منتخب مصر

وجه أحمد حسن، نجم منتخب مصر السابق وعضو اللجنة الفنية، رسالة مباشرة إلى حسام حسن المدير الفني للفراعنة، شدد خلالها على أن ما يثار حول وجود مؤامرات لإبعاده عن منصبه لا يمت للواقع بصلة، وأن نتائج المباريات تبقى هي الفيصل الوحيد في بقاء أي مدرب أو رحيله.

وقال أحمد حسن: “أنا بقول رسالة أو وجهة نظر مهم توصل للكابتن حسام حسن، لإن في ناس حواليك بتأذيك، دايمًا مصورينلك إن كل الناس ضدك، وإن اتحاد الكرة عايز يبعدك، وإن في محاربة ليك، وده غير صحيح. النتيجة هي الحكم، لو عملت نتائج كويسة هتفضل مدير فني لمنتخب مصر، ولو النتائج مش كويسة طبيعي هيبقى في تغيير.”

وأضاف: “الكابتن محمود الجوهري مثلًا خد بطولة أمم إفريقيا 1998، ودي كانت بطولة صعبة جدًا، لكن بعدها شارك في كأس القارات واتغلب، والنتيجة مكانتش كويسة فاتشال، مع إنه كان واخد بطولة أمم إفريقيا. والكابتن حسن شحاتة اللي خد 2006 و2008 و2010، لما جيه 2011 والنتيجة مكانتش كويسة خرجنا من التصفيات فاتشال. فالقصة مش مؤامرات، القصة نتائج.”

وتابع الصقر: “الناس كلها بتحبك يا كابتن حسام، واللي حواليك بيأذوك من غير ما يقصدوا، لإن دايمًا بيقنعوك إن في ناس بتحاربك. صدقني مفيش الكلام ده، في الآخر مفيش حكم غير النتائج. لو عملت بطولة أمم إفريقيا بشكل كويس أو نافست عليها، هتستمر مدير فني، ولو ملعبتش بشكل كويس أو مفيش نتائج، طبيعي يبقى في تغيير.”

وختم أحمد حسن حديثه قائلًا: “إحنا كلنا بنتمنى إن المنتخب يعمل بطولة قوية ويفرح الشعب المصري، لإن مصر كلها نفسها تفرح، والناس كلها وراك وبتدعمك، وكل ما مطلوب إنك تركز في شغلك وتبعد عن أي كلام تاني.”