سامي قمصان يوضح نقطة حاسمة يحتاجها ريبيرو ما بين مصر وجنوب افريقيا

حذر سامي قمصان، المدرب العام للنادي الأهلي، من أن المدير الفني الجديد، ريكاردو ريبيرو، قد لا يكون قد استوعب بعد طبيعة الدوري المصري، مشددًا على أن المنافسة المحلية تختلف جذريًا عن الدوري الجنوب إفريقي، سواء من حيث الضغط الجماهيري أو طريقة لعب الأندية.

وقال قمصان، خلال ظهوره عبر قناة الأهلي:“ممكن يكون لسه مفهمش الدوري المصري، وحط تحت دي خطوط كبيرة جدًا. ريبيرو جاي من دوري مفيهوش الضغوط اللي هنا، هناك بيخسروا وبعد الماتش بيرقصوا، والفرق كلها بتلعب جيم مفتوح.”

وأضاف:“هو ممكن يكون متخيل إن الفرق هنا هتلعب بنفس الطريقة، خاصة إنه بياخد وقت طويل في البيلد أب. لكن الواقع إنك بتلاعب حوالي 80% من الفرق اللي هتسيبلك وسط الملعب ومش هتضغط عليك. فهتضيع وقت كتير جدًا لو ما قدرتش تطور حلول مناسبة. الفرق اللي هتضغط قليلة: زي الزمالك، بيراميدز، سيراميكا، وبنك الأهلي، إنما أغلب الفرق بتكون حذرة جدًا ضد الأهلي.”

وأوضح:“انت مش هتبدأ بناء الهجمة من التلت الأولاني.. لأ، هتبدأ من وسط الملعب، ولازم يكون عندك حلول سريعة. ودي حاجات لازم يكتسبها من التجربة. ساعات كتير مهما نقول للمدرب الفني على تفاصيل، مبيقتنعش غير لما يشوف بعينه.”

وتابع:“أوقات بحذر مثلًا من فريق كويس، يقولك أنا شوفتهم في الفيديو مش أحسن حاجة. بس الواقع مختلف. الإسماعيلي هو الإسماعيلي، والزمالك هو الزمالك، والفرق دي لازم تشوفها عشان تقتنع.”

واختتم:“أكيد كابتن يوسف وكابتن عماد هيساعدوه في إنه يفهم طبيعة الدوري المصري بشكل أسرع، ويوصلوا له الصورة كاملة.”