خالد الغندور “يقصف جبهات”.. ويكشف أكاذيب الأهلي بعد رحيل ريبيرو!

في خضم الجدل الدائر حول مصير الجهاز الفني للأهلي بعد رحيل الإسباني خوسيه ريبيرو، خرج الإعلامي خالد الغندور عبر أثير إذاعة “أون سبورت” ليسلط الضوء على كواليس مثيرة تتعلق بمفاوضات المدرب الراحل، وردود فعل اللاعبين، إلى جانب ما تردد عن ارتباط اسم علي ماهر بالقلعة الحمراء.

وقال خالد الغندور عبر راديو “أون سبورت”: “تعالوا نروح كده لبعض الحاجات، ريبيرو بيودع النادي الأهلي، وريبيرو بيشكر العمال اللي بيودعوه وبيقولوا له شكراً وكده، لكن 99% من اللاعيبة محدش نزل له حاجة على السوشيال ميديا ومش عارف ليه”.

وتابع: “ريبيرو أنهى مفاوضاته مع النادي الأهلي بالحصول على شهرين، وسيبكم من بعض الناس اللي طلعت قالت إن الراجل أول ثلاث شهور لو مشيته مش هياخد شرط جزائي، يا راجل ليه؟ هو أنت أما جيت تتعاقد مع المدير الفني راح اتقاله بقولك إيه بعد ثلاث شهور لو احنا مشيناك عشان احنا حاسين إنك احتمال تتعادل مع مودرن وتعمل ماتشات وحشة في كأس العالم فاحنا بعد ثلاث شهور هنمشيك مش هتاخد ولا جنيه؟ فالراجل قال لك يا سلام تحت أمرك يا باشا؟ أي كلام في أي كلام”.

وأضاف: “وأقول لكم حاجة لذيذة قوي برضه كمان من ضمن الحاجات اللي طلعت، قالك علي ماهر، وخدوا بالكم من الكلام اللي جاي ده، سبحان الله علي ماهر يوم ما الأهلي خسر من بيراميدز، ثاني يوم راح الشهر العقاري في النادي الأهلي، دي صدفة يا جماعة صدفة يعني”.

وأردف: “عايز أقول لكم حاجة، علي ماهر حبيبي يعني، فعلي ماهر ساكن في التجمع الخامس، فصحي الصبح مثلا عايز يجدد بطاقته، وده تجديد البطاقة ده يعني ممكن وأنت في الكشك اللي جنبك تجدد بطاقتك، خلاص بقى في مولات وفي كل حتة”.

واستكمل: “طب سيبكم من القصة دي، طب في نادي أهلي في مدينة نصر وفي نادي أهلي في التجمع، ما هو الأهلي عنده خمس فروع يا جماعة، فسبحان الله علي ماهر راح صحي الصبح وطلع من التجمع يوم ما الأهلي اتغلب بالليل وقالك إيه أنا هطلع عندي شوية حاجات هعملها في الشهر العقاري، طب أروح القريب ولا أروح البعيد؟ لا والله أنا زهقان شوية هروح أتمشى لغاية النادي الأهلي اللي في الجزيرة”.

واستمر: “فراح اتمشى هناك شافوه وهو داخل، فقال لهم ده أنا داخل الشهر العقاري يا جماعة، فالنادي الأهلي وبعض المسؤولين بعد ما شافوه قالك تعالى يا علوة، أنت إيه اللي جابك هنا يا علوة؟ تعالى عايزين نتفاوض معاك شوية كده، ده أنت جاي بالصدفة سبحان الله”.

وأشار: “علي ماهر شخصية مستقلة، يعني محدش يعرف يسيطر عليه يقول له تعالى يمين تعالى شمال، وعنده فكر وراجل عايز يجي بالجهاز الفني بتاعه بالكامل”.

واختتم: “واتقاله بقى علوة، هتقعد معانا لغاية يناير وبعد كده هنشوف لو هيجي مدرب أجنبي تيجي أنت مساعد معاه.. قالهم ده عفى عليه الزمن خلاص، أنا فكرة إن أنا أجي مدير فني مبجيش مع حد .. ثم أنا لو النادي الأهلي عايزني، أنا هعمل عقد رسمي بسنتين وفي شرط جزائي، يعني أنا عقد رسمي وسنتين لان أنا هسيب سيراميكا، أنا مستقر في سيراميكا”.